Mei Bekannte bei Sonneunnergang im Südpazifik uff ihrm Boot innere Bucht von äner von de 176 Insele vom Königreich Tonga, das zu Polynesien gehört.
Letscht Woch Donnerschtags hatt ich Ihne hier vommeiner Bekannte vezählt, die seit 2007 mit ihrm Mann die Welt umsegelt unn unnerwechs in de Werkstatt von ihrm Boot Schmuck-Unikate aus Natur-Materialje ferticht. Weil bei ihr im letschte Johr Bruschtkrebs feschtgestellt wurd, isse im Herbscht opperiert worr unn hatt im Winter Chemotherapie unn Bestrahlunge kriet.
Wie die zwä am letschte Samschtag widder los sinn, um ihr Weltumseglung fortzusetze, hott das widderstreitende Gedanke unn Gefühle bei mir ausgelöst. Uff de än Seit honn ich ihr Mut bewunnert: So kurz no dere bösartich Krankheit sei Weg so konsequent fortzusetze – Donnerwetter, Hut ab!
