Antworten und Vorschläge der Leser zu den Kolumnen aus den vergangenen Wochen.
Zurück zu de Wurzele – ich unn de Paul unn e widderspenstich Gepäck-Kärrelche
Nachfolgend eine Rückmeldung auf meine Kolumne vom widerspenstigen Gepäck-Kärrelchen in der Psychosomatischen Reha-Klinik.
Gerhard Engbarth
Liewer Gerhard,
das is awwer mol e scheeni Geschicht. Mir wisse jo all, dass es Lääwe sowieso die schennschde Geschichte vazählt. Ich hann em Ella, das wo zwei Haiser weider wohnt wie mir, von deinem Kärrelsche vazählt. Do hat ääs mich gefroot, ob isch an Seelewanderung glaawe däät. Ja, gudd, ich hann die Antwort e klään bissje offe geloss.
Ääs is awwer hunnertpro der Meinung, dass de Ewald, der wo ihm sei Mann is, in seim friejere Lääwe mo so e Kärrelsche gewään is. Schunn seit jeeher däät der die Fieß so komisch setze, dass de denke kinnscht, es wäre Rolle drunner un er wisst nit, in was fa Richdung er tabbe will. Un wenn ääs ne irjendwie irjendwo hinlenke will, macht er grad es Gejedeel un duut abtrifte. Es Ella saat, das wär psüscholoogisch un däät Rollespiel heiße. Mach was draan! Kannschs eeh nit ännere.
Vom Ella soll ich dich übrischens aach grüße. Ääs däät immer saahn, saat's: „Mir sinn die Geschichte vom Gerhard liewer wie Fernseh! Bei demm merkt ma, dass er uns klääne Leit bis in unser Wohnzimmer gucke ddut!“
Alla, bis spääder widder mol.
's Mariddasche vum Saarland
(Marita Engel, heute in Spabrücken wohnend)