Folge 146: Mei liewer Adler – Hans-Georg Fabel 
zum 60. Geburtstag

Mei liewer Hans-Georsch, herzliche Glückwunsch zu deim 60. heut. Dass mir uns schonn länger kenne, sieht mer am Fotto, wo du uffem Schoß von deiner Oma rumturnscht, de Käthe Merg, für mei Schwester unn mich es Tante Kätthche. Dei Opa, de Schneidermeischter Gustav Merg war für uns de Onkel Guschtav. Wie mei Mudder das Fotto gemacht hatt, sat se, ich sollt aach so schön lache wie ihr zwä, wo du mir doch grad ins Ohr gezwickt hattscht. unn außerdem hosche gesädert. Deshalb hatt's Tante Kättche e Säderläppche instecke. Wenn heut äner e Fotto von uns mache wollt, dete mir bestimmt beide lache, denn du zwickscht anner Leut nimmehr in die Ohrlappe unn sädere duschte aach nimmehr. Dass ich emol Namensschöpfer für dei Freundeskreis werre det, hätt ich mer nit träume losse. Wie das kam, muss ich de Leser vezehle.